Die Auflösung der Handschriftensiglen und Hinweise zur Edition finden Sie hier.

Papst Hilarius an Bischof Ascanius von Tarragona

CI  ITEM  EIUSDEM  HILARI  PAPAE  AD  EUNDEM  ASCANIUM  TARRACONENSEM  EPISCOPUM  DE  HIS,  QUAE  SUPERIUS  SUNT  SCRIPTA.

Dilectissimo  fratri  Ascanio  Hilarus  episcopus.

Divinae  circa  nos  gratiae  memores  esse  debemus,  qui  nos  per  dignationis  suae  misericordiam  ob  hoc  ad  fastigium  sacerdotale  provexit,  ut  mandatis  ipsius  inhaerentes  et  in   quadam  sacerdotii[1]  eius  specula  constituti  prohibeamus  illicita  et  sequenda  doceamus.  Unde  directis  per  Traianum  subdiaconum  nostrum  litteris  admonemus,  ut  quae  male  sunt  facta,  corrigantur.  Et  miramur  admodum  dilectionem  tuam  Barcilonensium  petitiones  non  solum  nulla  auctoritate  retundisse,  verum  etiam  directis  ad  nos  litteris  consummationem[2]  pravi  desiderii  postulasse  adhibendo  in  epistolarum  praemio  concilii  mentionem  tamquam  culpae  minuerent  excessus  per  multitudinem  imperitorum,  cum,  si  etiam  sub  significatione  unusquisque  sui  nominis  tecum  pariter  retulisset  et  subscriptiones  proprias  fratres  singuli  commodassent,  dilectionem  tamen  tuam  rei  de[3]  qua  displicet  summa  tangebat,  quia  pro  loco  et  honore  tibi  debito  ceteri  sacerdotes  docendi  fuerant,  non  sequendi.  Unde  sicut  in  generalibus[4]  litteris  indicavi,  Irenaeus[5]  ad  propriam  revertatur[6]  ecclesiam  et  Barcilonensibus  de  suo  clero  protinus  consecretur  antistes[7].  Et  licet  hi,  qui  praeter[8]  notitiam  atque  consensum  tuae  dilectionis  ordinati  sunt  sacerdotes,  cum  suis  debuerunt  auctoribus  submoveri,  ne  quid  tamen  in  tanta[9]  necessitate  decernamus  austerum,  eos,  qui  episcopi  facti  sunt,  ita  volumus  permanere  in  apostolicis  praeceptionibus  et  statutis  sanctorum  patrum  non  reperiuntur  obnoxii  ac  deinceps  nihil  quod  contra  disciplinam  ecclesiasticam  veniat,  sicut  hactenus  factum  est,  perpetretur.  Tuae  sollicitudinis  est,  frater  carissime,  debitam  tibi  auctoritatem  tueri  et  illicitis  non  modo[10]  non  praebere  assensum,  sed  etiam  cuncta,  quae  contra  regulam  facta  reppereris,  coercere  atque  ante  omnia,  quae  sola  humanitate[11]  decernimus,  Irenaeum  ad  ecclesiam  suam  redire  compelle,  ad  quam  sponte  potius  remeare  debebit,  si  sacerdotali  consortio  non  metuit  separari.  Nec[12]  unius  ecclesiae  duo  esse  permittantur  antistites,  quod  opportunius  supradicti[13]  subdiaconi  fieri  delegamus  instantia,  quem  etiam  pro  conservanda[14]  ecclesiae  disciplina  commeare  ad  Spanias  dispositionis  nostrae  facit  auctoritas.

Deus  autem  incolumem  te  custodiat,  frater  carissime.

P9629,  f.  142va

[1]  sacerdotum  P9629

[2]  conversationem  P9629

[3]  da  P9629

[4]  generalibilibus  P9629

[5]  hirineus  P9629

[6]  revertatur  korr.  aus  revertisset  P9629

[7]  antistites  P9629

[8]  propter  P9629

[9]  tanta  korr.  aus  tata  P9629

[10]  modo  korr.  aus  modis  P9629

[11]  unitate  P9629

[12]  ne  P9629

[13]  supradicti  korr.  aus  supraditi  P9629

[14]  conversanda  P9629

© 2005 Karl-Georg Schon
Dieser Text ist urheberrechtlich geschützt. Er steht unter der GNU Free Documentation License.
Demnach dürfen Sie ihn frei weiter verbreiten und bearbeiten, vorausgesetzt Sie nennen den Namen des ursprünglichen Autors und Sie geben auch anderen das Recht den von Ihnen bearbeiteten oder verbreiteten Text unter den gleichen Bedingungen weiter zu verbreiten. Im einzelnen finden Sie Bestimmungen der GNU Free Documentation License unter dem Menüpunkt Lizenz.

Zuletzt geändert am 23.4.2005